新竹縣海陸客家語文協會


Kièd sàn
1.					1.會話蹶山 1. 「蹶山」人物阿香阿華嫂阿華哥阿香：唉噢！阿華嫂，恁早愛去那？阿華嫂：會天光哩唷！還講早，我想愛去飛鳳山蹶山。阿香：你仰般去？阿華嫂：我阿華會用hài iă（小包車）載我去。阿香：我乜想來去蹶蹶仔，分我跈好沒？阿華嫂：好啊！有麼介毋好，多人多伴較鬧熱。阿香：等我一下仔，做得沒？我想換雙鞋，袈加領衫，驚怕會翕著汗。阿華嫂：好啊！愛較遽兜！早去早轉，轉來還愛去市場買菜。阿香：nì săng（日語，哥哥），承蒙你分我跈。阿華哥：講麼個承蒙哪，老鄰舍，熟熟事事摎麼個番薯，毋使恁拘禮（拘謹）。阿香：係話（話不是這麼說），又乜愛你肯。阿華哥：該沒問題哪！來上車，你摎我婦人家坐後背兩儕較有好dam de（閒聊）。鹿寮坑文化工作室編譯
Ngin vùd(人物) : A⁺ Hiòng(阿華) , A⁺ Fa Só(阿華嫂) , A⁺ Fa gò(阿華哥) A⁺ Hiòng : èd ò . A⁺ Fa Só , ăn zó ŏi hĭ nai⁺ . A⁺ Fa Só : voi⁺ tièn gòng lió , han gong⁺ zó . ngai siong⁺ ŏi hĭ Fùi Fung⁺ Sàn kièd sàn . A⁺ Hiòng : ngi ngiong⁺ bàn hĭ ? A⁺ Fa Só : A⁺ Fa voi⁺ rhung⁺ hài iă zăi ngai hĭ . A⁺ Hiòng : ngai mă siong⁺ loi hĭ kièd kièd er⁺ , bùn ngai ten hó mo ? A⁺ Fa Só : hó a⁺ ! rhìu màg găi m hó , dò ngin dò pàn , hău nau⁺ ngièd . A⁺ Hiòng : den⁺ ngai rhìd há er⁺ , zŏ ded mo ? ngai siong⁺ ŏi von⁺ sùng hai , gà gà liàng sàm , giàng pă voi⁺ sìb do⁺ hon⁺ . A⁺ Fa Só : hó a⁺ ! ŏi hău giag dèu , zó hĭ zó zón , zhón loi han ŏi hĭ shi⁺ chong mài cŏi . A⁺ Hiòng : nì săng . shin mung ngi , bùn ngai ten . A⁺ Fa Gò : gong⁺ màg găi shin mung nŏ ! lo⁺ lin sha⁺ , shùg shùg sii⁺ sii⁺, laù màg găi fàn shu , m sii⁺ ăn gì lì . A⁺ Hiòng : hé và , rhiú mă ŏi ngi hén . A⁺ Fa Gò : gai –mo mŭn ti nà , loi shòng chà . ngi làu ngai fu⁺ ngin gà kiung⁺ ha⁺ cò heu⁺ bŏi . lióng sa hău rhìu ho⁺ dam de .
2.					1.會話蹶山 2. 阿華嫂：飛鳳山到哩唷！下車試著涼沁涼沁，好得有袈加領衫。阿香：我乜就恁樣想，愛帶茶上去沒？阿華嫂：帶上去乜好，嘴渴，有好嘬一下。阿香：盡久沒蹶山，蹶一下仔就氣扯氣急，還沒用。阿華嫂：有伴，係好天，常常來，兩下半乜盡會蹶。阿華哥：你兜看該兜細o仔（小孩子）還恁細恁會走，一下仔liŭng上（衝上）龍崗頂去，也毋知痶（累）。阿華嫂：愛使歇下困沒？阿香：毋使啦，慢慢蹶，慢行快到，還七後生八後生，蹶到氣呼呼仔，會分人笑死去。阿華嫂：也著，沒就來慢慢蹶。阿香：你兜有看著肨尾鼠（松鼠）沒？阿華嫂：哪位！哪位！阿華哥：你看該牛眼樹頂毋係乜？阿華嫂：我看著咧！一下仔就躍走哩唷！阿香：我仰沒看著咧哪！鹿寮坑文化工作室編譯
A⁺ Fa Só : Fuì Fung⁺ Sàn dŏ liò , hà chà chĭ dó liong sím liong sĭm , ho⁺ ded rhìu gà gà liàng sàm . A⁺ Hiòng : ngai mă ciu⁺ an ngiong sióng ,ŏi dăi ca shòng hĭ mo ? A⁺ Fa Só : dăi shòng hĭ mă hó , zhŏi hod , rhìu ho⁺ chòd rhìd ha⁺ . A⁺ Hiòng : cin⁺ giú mo kièd sàn , kièd mo gi⁺ pu⁺ ciu⁺ hĭ chà hĭ gib ,han mo rhung⁺ . A⁺ Fa Só : rhìu pàn , hĕ ho⁺ tièn , shong shong loi , liong⁺ ha⁺ băn mă cin⁺ voi⁺ kièd . A⁺ Fa Gò : ngi dèu kŏn gai găi sĕ o er han ăn sĕ , ăn voi⁺ zéu . rhìd há er⁺ ciu⁺ liŭng shòng liung gòng dáng hĭ , rha⁺ m dì tiám . A⁺ Fa Só : ŏi sii⁺ hièd ha⁺ kŭn mo ? A⁺ Hiòng : m síi lă , man⁺ man⁺ kièd , man⁺ hang kuăi dŏ , han cìd heu⁺ sàng , bàd heu⁺ sàng , kièd dŏ hĭ fù fù er⁺, voi⁺ bùn ngin siău sí hĭ . A⁺ Fa Só : rhá chòg , mo ciu⁺ loi man⁺ man⁺ kièd . A⁺ Hiòng : ngi dèu rhìu kŏn do⁺ pŏng mùi chú mo ? A⁺ Fa Só : lau⁺ vui⁺, lau⁺ vui⁺ ? A⁺ Fa Gò : ngi kŏn gai ngiu ngan⁺ shu⁺ dáng m hĕ mĕ ? A⁺ Fa Só : ngai kŏn dó lè , rhìd há er⁺ rhíu ciòg zéu liò . A⁺ Hiòng : ngai ngiong⁺ mo kŏn dó lè no⁺ ?
3.					1.會話蹶山 3. 阿華嫂：你看較高兜仔，該毋係乜？阿香：看著咧！佢个毛摎樹皮差毋多共樣，看沒幾出，尾還長哦！阿華哥：你毋好看該肨尾鼠恁生趣，仰般个摝人，你就毋知，樹皮這喫一垤，該喫一垤，柑仔，水梨，麼個都喪（破壞）得著。阿華嫂：過行，毋好停。阿香：行行仔，續熱起來，出汗哩唷。阿華哥：汗捽捽仔（擦一擦）驚怕會翕到汗。阿華嫂：行到哩唷，這頂背節較平，透下氣，等氣透較勻兜，正好食茶。阿香：該晃槓仔沒人晃，你倆老愛去吊晃槓沒？阿華嫂：盡久沒晃咧，老人成小子，來晃晃仔乜盡生趣。阿華哥：天大光，日頭會出哩唷，看仰般遠著。阿華嫂：山頂个空氣還好，透加幾下大氣，企加一下仔，盡毋盼得轉樣。阿香：阿華嫂，幾多點咧，緊觸觸仔，來个時節沒帶著時錶，幾多點都毋知。阿華嫂：ngì ngài（將近）會七點哩唷，茶食食仔，沒（要不），就來轉。鹿寮坑文化工作室編譯
A⁺ Fa Só : ngi kŏn hău gò dèu er , gai m hĕ mĕ ? A⁺ Hiòng : kŏn dó lè . gi găi mò làu shu⁺ pi cám dò kiung⁺ rhong⁺, kŏn mo gìd chud , mùi han chong ér . A⁺ Fa Gò : ngi m ho⁺ kŏn gai pŏng mùi chú , chĭ dó ăn sèn cĭ , ngióng bàn găi lug ngin , ngi ciu⁺ m dì , shu⁺ pi li kiĕ rhìd dĕ , gai kiĕ rhìd dĕ , gàm er , shui⁺ li , mag găi du⁺song⁺ dèd dó . A⁺ Fa Só : gó hang ! m ho⁺ tin ! A⁺ Hiòng : hang hang er⁺ să ngièd hí loi , chùd hon⁺ liò . A⁺ Fa Gò : hon⁺ cùd cùd er⁺ , giàng pă voi⁺ sìb do⁺ hon⁺. A⁺ Fa Só : hang dŏ liò ! lia dáng bŏi zied hău piang , teu⁺ha⁺ hĭ , den⁺ hĭ teu⁺ hău rhun dèu zhăng ho⁺ shìd ca . A⁺ Hiòng : gai gong gŏng er mo ngin gong , ngi liong⁺ ló ŏi hĭ diău gong gŏng mo ? A⁺ Fa Só : cin⁺ giú mo gong lè , lo⁺ ngin shang sĕ zií , loi gong gong er⁺ mă cin⁺ sèn cĭ . A⁺ Fa Gò : tièn tai⁺ gòng , ngìd teu voi⁺ chud lió , kŏn ngióng bàn rhán dó . A⁺ Fa Só : sàn dáng găi kùng hĭ han hó , teu⁺ gà gi⁺ ha⁺tai⁺ hĭ , kì gà há er⁺ , cin⁺ m păn ded zhón rhong⁺ . A⁺ Hiòng : A⁺ Fa Só , gìd dò diám lè , gin⁺ chùg chùg er⁺, loi găi shi zied mo dăi do⁺ shi biáu , gìd dò diám du⁺ m dì . A⁺ Fa Só : ngì ngài voi⁺ cid diám liò , ca shìd shìd er⁺ , mo , ciu⁺ loi zhón .
4.					1.會話蹶山 4. 阿華哥：你兜講愛轉就來轉，我沒麼个意見。阿香：朝晨就盡承蒙你呢，蹶蹶仔，歸身試著還鬆爽，下二輪來，再過分我跈啊！阿華哥：毋使恁客氣，走得你就摎我講，大家共下去，較有伴。阿香：承蒙你哦，阿華嫂，來去買菜囉！鹿寮坑文化工作室編譯
A⁺ Fa Gò : ngi dèu gong⁺ ŏi zhón ciu⁺ loi zhón , ngai mo màg găi rhĭ giĕn . A⁺ Hiòng : zhàu shin ciu⁺ cin⁺ shin mung ngi nér ! bùn ngai ten , kièd kièd er⁺, hon⁺ chùd chud er⁺ , gùi shìn chĭ dó han sùng sóng , han⁺ lìn loi , zăi gó bùn ngai ten a⁺ ! A⁺ Fa Gò : m sii⁺ ăn hàg hĭ , zeu⁺ ded , ngi ciu⁺ làu ngai góng , tai⁺ gà kiung⁺ ha⁺ hĭ , hău rhìu pàn . A⁺ Hiòng : shin mung ! A⁺ Fa Gò , loi mài cŏi lò !

ti⁺ 99~100 kŏ 返回目錄 2. 三句半話

海陸客語拼音入門 1.會話 Kièd sàn